"In de grap leet de wiésheid verborge!"

Door Pim Mattheijssen

"Ik ben geen held, tenminste niet een die telt, maar ik doe mijn best te blijven staan. Wat ik schreeuw lijkt niet slecht, maar wat ik schrijf ben ik echt. Zo kan ik een beetje van de wereld aan."

Ein interessant book euver eine oorlog ‘kei lang geleeje’ stelt mich in de gelaegeheid um alle gebeurtenisse van de letste waeke in ein groëter gehiel te bekiéke.

Maar, nao de letste bladzijde waas ’t verhaol euver talloze tanks, soldaote en gewere op ’t geschreve ind. Luusterend nao de vraog welke invölling ik dezen daag nog gaeve kôs bleef ik speule mit ein döbbele gedachte euver de waerd van ein geschiedenisbook, ein jaortal, ‘nne persoën, ‘nne daag of éin inkel moment.

Hangend achter miene kompjuter besloot ik ein dvd te bekiéke euver ‘nne biezôndere daag dae mich persuünlik vuül moeïe momente haet gebrach. Ein visueel verhaol euver 21 liérare die in gezelschap van 21 liérlinge ein indrökwekkend stökske geschiedenis hebbe geschreve. Ik bin in idder geval gruüts op ’t feit det ik dees minse van ’t Bliërickse Blariacum College op dae biezôndere daag van doënbeej mei heb meuge make.

21 liérare en 21 liérlinge van ’t Blariacum College hadde 21 waeke getraind um de 21 bäög van de Franse berg L’Alpe d’Huez mit de fiets te kinne beklumme. Dit projek waas ontstaon nao aanleiding van éin bepaolde gedachte die op dees Bliërickse schoél aan de orde van iddere’n daag waas, namelik, ’t streve nao eine gezônde laevesstiel veur de jeug. Nog veurdet dit initiatief vorm kreeg woort d’r ein ontzettend good doel aan ’t projek gekoppeld, KIKA, Kinder Kankervreej. Sponsors goove gaer eur geld en ’t enthousiasme rônd deese unieke opzet greujde idder oor. In mien verstroeïde gedachte ging ik efkes truuk nao dae 23e september, d’n daag van The Big Climb2006.

23-09-2006, Bourg d’Oisans

Nog véúr daag en dauw woort ik wakker gemak door mien collega prissentatrice van Umroop Venlo die mich aanspoorde um ‘nne telder pasta nao binne te schuúve. Dit netuurlik neet zônder ein spésjale reeje, want weej ware mit 4 jeugdige vreejwillegers aafgereis nao de Alpen um ein ripportage te make van The Big Climb 2006. Dae telder mit pasta beteikende veur mich in idder geval ein gezônd en voedend begin van d’n daag, want ik had mich inkele waeke truuk al veurgenaome um mich zelf auk bloët te stelle aan éin van de groëtste oétdaginge van de Franse Alpen.

Vandaag, 23 september, waas ’t zoë wiét, 21 zwaore bäög fietsend nao baove. Kiékend nao die 21 kindersnuútjes onder aan de start veulde ik mich vasbeslaote um nao 21 aafgetelde bäög, baove aan de finish van dezen imposante berg te kômme.

De trappers dreijde soepel rônd op de letste vlakke hônderd maeter véúr ’t ind van ’t Franse dörpke Bourg d’Oisans en ’t begin van L’Alpe d’Huez. De stilte in de groep waas indrökwekkend en ’t besef van ‘waat kômme ging’ stônd geschreve in de strakke, maar optimistische gezichsoétdrökking van allemaol die minse mit eine blauwe wielertrui. De stilte, ’t ontzag, ’t besef en ’t moment, mit gen wäörd te beschriéve, maar ein biezôndere herinnering die nog altiéd laef in mien vertroeïde gedachte.

Blood, zweit en traone ware neet weg te dinke aan ’t ind van de letste maeters baove op d’n berg, dae mit zien imposante veurkômme meinig mins aan ’t dinke had gezatte. Idderein had ’t gehaold, en wao sômmige ongeluivig eur prestasie erkinde kwame emosies beej vuül liérare en liérlinge in traone tot oétdrökking.

Ein oétgestrek berglandschap waas ’t dekôr veur dit stökske geschreve geschiedenis en wao idderein wäörd tekort kwaam um zien belaeving te vertale, trok ik mich éfkes tiëntalle maeters truuk. Ik zat mich op ‘nne groëte stein, 2000 maeter baove Bourg d’Oisans en de bewoënde waereld, dae onder aan de voot van L’Alpe d’Huez as altiéd ziene gangk ging. Iëwige snieje, gelaege örges wiét weg op ‘nne nóg hoëgere berg waas mien oétzich. Nogmaols, ein biezônder moment van vuül waerd, uniek as herinnering.

Biezônder waas ’t feit det idder individu, idder kind ziér bewus bezig waas mit ’t gooje doel van dit projek, KIKA, Kinder Kankervreej. Elders, liérare en liérlinge sprooke euver kinder die noeïts ‘normaal’ kinne laeve, noeïts ens vreej kinne zien, noeïts ens ’n stök kinne gaon fietse. Det besef waas beej ôs noeïts groëter as vandaag, 23 september 2006, onder aan de voot van de Alpe d’Huez, 2000 maeter baove de ziejespeegel in ’t zich van de finish of in éin van de 21 loëdzwaore bäög, örges dao tösse-in.

Au revoir,

Pim